Мектептегі қауіпсіздік: Кибербуллингтің алдын алу және құқықтық сауаттылық

Бүгінгі таңда жасөспірімдердің интернет кеңістігіндегі қауіпсіздігі мен олардың құқықтық мәдениетін қалыптастыру — қоғам алдындағы ең өзекті міндеттердің бірі. Осы мақсатта М. Әуезов атындағы №33 жалпы орта мектебінде оқушылардың құқықтық сауаттылығын арттыруға бағытталған маңызды кездесу өтті.

Іс-шара жоспарына сәйкес, Жамбыл облысы ПД Тараз қаласы ПБ 1-і полиция бөлімі Криминалдық полиция бөлімшесінің аға жедел уәкілі, полиция майоры Қ.О.Исмаил оқушылармен кездесіп, ауқымды түсіндірме жұмыстарын жүргізді.

 Кездесу барысында екі негізгі бағыт бойынша дәріс оқылды:

 «Кибербуллинг дегеніміз не, оның формалары мен салдары» — 5-7 сынып оқушылары үшін әлеуметтік желілердегі қудалау мен жағымсыз әрекеттерден қорғану жолдары талқыланды.

 «Кибербуллингке қатысты құқықтық аспектілер мен заңдар» — 8-10 сынып оқушыларына интернет желісіндегі әрбір іс-әрекеттің заңдық жауапкершілігі түсіндірілді.

Полиция майоры Қ.О.Исмаил оқушылар назарына мынадай маңызды мәселелерді жеткізді:

 Жасөспірімдер арасындағы құқық бұзушылықтың туындауына әсер ететін негізгі себептер;

 Заң талаптарын бұзған жағдайда қолданылатын әкімшілік және қылмыстық жауапкершілік түрлері;

 Виртуалды әлемде өзіңді және жақындарыңды қауіп-қатерден қорғауға арналған интернеттегі қауіпсіздік ережелері;

 Қоғамдағы заңға бағынудың маңызы мен құқықтық мемлекет қалыптастырудағы жастардың рөлі;

 Мектеп ішінде және қоғамдық орындарда оқушылардың өз-өзін дұрыс ұстау мәдениеті.

Кездесу соңында оқушылар спикерге көкейкесті сұрақтарын қойып, заң аясында толыққанды жауаптар алды. Мұндай іс-шаралар балалардың құқықтық санасын оятып, қылмыстың алдын алуға үлкен септігін тигізері сөзсіз.